حقوق العباد، توبہ اور دل کا سکون

السلام علیکم مفتی صاحب۔ میں نے 2024 میں ایک یوٹیوب چینل شروع کیا تھا جہاں ٹیکنالوجی سے متعلق ویڈیوز بناتا ہوں۔ میرا کام حلال ہے، لیکن شروع میں والد صاحب کو اس بارے میں معلوم نہیں تھا کیونکہ وہ چاہتے تھے کہ میں صرف پڑھائی کروں۔ بعد میں انہیں پتا چلا تو کافی مسائل ہوئے، چینل بند بھی کروایا، پھر بہت سمجھانے کے بعد میں نے نیا چینل شروع کیا۔ اس نئے چینل پر پہلے سے بہتر پیش رفت ہے، مگر پھر بھی وہ کامیابی نہیں مل رہی جس کی میں امید کر رہا ہوں۔ میرا اصل مسئلہ یہ ہے کہ بچپن اور کم عمری میں مجھ سے بہت غلطیاں ہوئیں۔ میں نے کچھ لوگوں کے پیسے اور چیزیں لی تھیں، یعنی لوگوں کے حقوق تلف کیے۔ اس وقت مجھے اس گناہ کی سنگینی کا اندازہ نہیں تھا، لیکن اب اپنی غلطی کا احساس اور ندامت ہے۔ اب میں آہستہ آہستہ لوگوں کے حقوق واپس کرنے کی کوشش کر رہا ہوں۔ کچھ لوگوں کو ان کا حق واپس دے چکا ہوں، اور جو وفات پا چکے ہیں ان کی طرف سے صدقہ بھی کیا ہے۔ میرے دل میں یہ خیال آتا ہے کہ کیا انہی حقوق کی وجہ سے میری زندگی میں بے سکونی، مشکلات اور کامیابی میں رکاوٹ آ رہی ہے؟ میں دعا بھی کرتا ہوں مگر دل کو سکون نہیں ملتا اور حالات بھی آسان نہیں ہو رہے۔ براہِ کرم میری رہنمائی فرمائیں کہ مجھے اب مزید کیا کرنا چاہیے تاکہ اللہ کی رضا بھی حاصل ہو اور دل کا بوجھ بھی ہلکا ہو جائے۔