وعلیکم السلام ورحمتہ اللّٰہ وبرکاتہ 

نفل طواف شروع کرنے کے بعد اسے مکمل کرنا واجب ہو جاتا ہے۔ اگر کسی عورت نے ایک چکر طواف کر لیا اور پھر حیض آ گیا، تو کوئی دوسرا شخص اس کی طرف سے باقی چکر پورے نہیں کر سکتا، کیونکہ طواف عبادتِ بدنی ہے اور نیابت اس میں جائز نہیں۔

حیض ختم ہونے اور طہارت حاصل کرنے کے بعد وہ خود باقی طواف مکمل کرے۔ اگر کسی وجہ سے وہ مکمل نہ کر سکے تو اس نفل طواف کی قضا کرنا لازم ہوگی۔

اس صورت میں محض حیض آ جانے کی وجہ سے نہ دم لازم ہے اور نہ صدقہ، البتہ طواف کو بعد میں خود مکمل کرنا یا اس کی قضا کرنا ضروری ہے۔