برتھ ڈے اور سالگرہ کا شرعی حکم

وعلیکم السلام ورحمتہ اللہ 

یومِ پیدائش (Birthday) اور یومِ شادی (Wedding Anniversary) کو ہر سال بطورِ رسم و تہوار منانا، اس کی باقاعدہ تقریبات کرنا، کیک کاٹنا، شمعیں جلانا، مبارک باد کی مخصوص رسومات ادا کرنا اور اسے ایک مستقل سالانہ روایت بنالینا، شریعتِ اسلامیہ سے ثابت نہیں۔ اس لیے اس طرح کی رسومات سے اجتناب کرنا چاہیے، خصوصاً جب ان میں غیر مسلم اقوام کی مشابہت، اسراف، فضول خرچی، اختلاط، موسیقی یا دیگر ناجائز امور شامل ہوں۔

اس سلسلے میں رسول اللہ ﷺ نے غیر مسلم اقوام کی مشابہت اختیار کرنے سے منع فرمایا ہے:

عَنْ ابْنِ عُمَرَ رضي الله عنهما قَالَ: قَالَ رَسُولُ اللَّهِ ﷺ: «مَنْ تَشَبَّهَ بِقَوْمٍ فَهُوَ مِنْهُمْ».

(سنن أبي داود، كتاب اللباس، باب في لبس الشهرة، حدیث: 4031)

اسی طرح دین میں نئی رسمیں ایجاد کرنے سے منع فرمایا:

قَالَ رَسُولُ اللَّهِ ﷺ: «مَنْ أَحْدَثَ فِي أَمْرِنَا هٰذَا مَا لَيْسَ مِنْهُ فَهُوَ رَدٌّ».

(صحيح البخاري، كتاب الصلح، باب إذا اصطلحوا على صلح جور فالصلح مردود، حدیث: 2697؛ وصحيح مسلم، حدیث: 1718)

اور آپ ﷺ نے فرمایا:

«إِيَّاكُمْ وَمُحْدَثَاتِ الْأُمُورِ، فَإِنَّ كُلَّ بِدْعَةٍ ضَلَالَةٌ».

(سنن ابن ماجه، المقدمة، باب اتباع سنة الخلفاء الراشدين، حدیث: 42)

لہٰذا برتھ ڈے اور سالگرہ کو شرعی حیثیت دینا یا اسے ہر سال لازم سمجھے جانے والی رسم کے طور پر منانا درست نہیں۔