Parents ki marzi ke khilaf divorcee aurat se shaadi

Agar larka aur larki dono baligh, aqil aur apni marzi se nikah karna chahte hain to shariyat ki ro se talaq yafta aur bachon ki maa se nikah karna bilkul jaiz hai, is mein koi harj nahi.

Walidain ka ehtram aur unki itaat zaroori hai, lekin yeh itaat sirf jaiz baton mein laazim hai. Agar walidain sirf muasharti wajah ya talaq yafta hone ki bunyaad par mana kar rahe hain to aisi surat mein unki baat maanna shar’an laazim nahi.

Albatta larke par laazim hai ke woh walidain ko narmi, adab aur hikmat ke sath samjhane ki poori koshish kare aur hatta-ul-imkan unki raza mandi hasil kare.

Agar tamam koshishon ke bawajood walidain na maanein to larka nikah kar sakta hai, nikah durust hoga, lekin is ke bawajood walidain ke sath husn-e-sulook, adab aur ta’alluq barqarar rakhna zaroori hai.

Aur larki ke liye zaroori hai ke nikah wali ki nigrani mein ho, aur agar wali bila wajah rukawat bane to shar’i tareeqe se nikah karwaya ja sakta hai.